انطباعات مبتعثه جديد ه رد على انطباعات مبتعث جديد

السلام عليكم ورحمة الله وبركاته ..

أول مرّة أرسل للقروب ..

بس بصراحة إيميل الأخ خلاني أحكي اللي في بالي ..

أنا مبتعثة لولاية كاليفورنيا ..

وما له داعي أقول إن هذي الولاية من أغلى الولايات في أمريكا ـ إذا ما كانت أغلاها فعلاً ـ ..

رح أبدأ كلامي من أول شي وهو تذاكر الطيران .. أشوف الإيصال اللي فيه سعر التذاكر ..

تصدقون من السعودية لواشنطن أرخص من واشنطن لسان فرانسيسكو ..؟ في الطائرة السعودية فيه وجبات ..

في الطائرة الأمريكية اشتر أي شي .. ما فيه شي ببلاش .. الشنط حقتنا ٧ .. في السعودية مشّونا بابتسامة ..

أما الخطوط الأمريكية خذوا على كل زيادة ١٢٥ دولار ..

يعني خذوا مننا ٥٠٠ دولار << لأن فيه منهم زيادة عن الوزن المسموح بكيلوين ..

تفتيش سقيم .. كأننا معنا قنابل .. مو مسافرين والسلام ..

<< مو مكتفين بأجهزة الاستشعار .. يفتشوننا بطريقة وسخة ..


خلصنا من الطيران .. وصلنا وحجزنا الفندق بـ ٨٢ دولار .. والفندق عادي جداً ..

ويقولون معه فطور .. والله لو تشوفون الفطور .. كرواسون وقهوة ويقولون فطور ..

بالنسبة لنظام المرور ..

كلمة حق .. النظام عندهم حلو .. << وهذا من الشعب نفسه .. ما أحد له منّة ..

يعني تمشي وأنت مرتاح .. ولا تسمع البوري إلا إذا غلطت ..

يعني لفّيت خطأ .. وإلا تأخرت ما مشيت في إشارة .. بتسمع البوري ..

مو مثل عندنا .. مجرد ما تولّع خضراء إلا وتدّهر البواري ..

<< وهذاقادرين نغيّره بإذن الله ..


المعيشة ..

غالية بشكل مو طبيعي ..

الأكل .. السكن .. الأماكن العامة .. الأدوات .. الصيانة ..

غير إنهم ياخذون ضرائب على كل شي ..

المستشفيات ..

غاااااااالية .. واللي ما عنده تأمين يموت ..

الحمد لله عندنا تأمين ..

بس مع كذا .. وربي الواحد يشيل هم الروحة لهم ..

يجلسون ساعة عشان يعبّون بياناتك ..

وبعدها يدخّلونك غرفة واجلس بالساعة والساعتين .. ويجون ويماطلونك ..

وفي الأخير يكشفون عليك ويطلّعون فيك ١٠٠ علّة .. عشان ياخذون حقهم ..

رايحة لهم عشان أسوي تحليل .. سووا لي تحليل .. وأشعّة .. وجلست عندهم ٤ ساعات ..

المعاملات ..

تجلس أياااااام عشان تكملها ..

وكل شوي طالبين شي ..

وكل شي لازم يضمنون حقهم فيه ..

الجوالات لازم توقّع معهم عقد ..

السكن نفس الشي ..

<< يعني الواحد لازم يكون متأكد ١٠٠٪ إنه هذا الشي اللي يبيه ..

يعني مثلاً احنا خذنا خطة عائلية .. ندفع ١٥٠ دولار شهرياً على خطين .. المكالمات بينهم مجاناً ..

وفيه نت مفتوح .. و ٥٠٠ دقيقة استقبال وإرسال ..

وأي رسالة مستقبلة أو مرسلة ياخذون عليها رسوم ..

وأي مكالمة مستقبلة ياخذون عليها برضو ..

<< ويااااا كثر ما نستقبل مكالمات دعائية .. وتُحسب علينا ..



أنا أحب بلدي ..

بغض النظر عن بعض العيوب ..

وطبيعي إني أسعى وغيري لإصلاحها ..

لكن إصلاحها ما يكون بمقارنتها بأي دولة ثانية ..

لكن .. لأننا كثير نسمع ناس تقول ” لو إننا في أمريكا كان صار كذا وكذا “ ..

وكأن أمريكا الجنة .. والدولة اللي ما تغلط ..

لكن الواحد لو شاف هالدولة عن قرب شاف إنها دولة فاضية .. وشعبها فاضي ..

دولة تختلق حرب كل ٢٠ سنة .. لأنها لو ما اختلقت هالحرب بيوصل اقتصادها للأرض .. << هذا كلام الشعب نفسه ..

دولة تعتمد بالواسطة .. مثلنا .. يعني مو مثل ما احنا فاهمين إنها دولة مستقيمة وبعيدة عن الواسطة ..

دولة شعبها أكبر كذاب في العالم .. << بعكس ما كنا متوقعين ..

أنا ضد تمجيد هالدولة ..

ومع رفع دولتي ..

وإن كانت دولتي فيها أخطاء .. لازم نسعى لتطويرها ..

على فكرة .. يا ما سمعنا ” الناس وصلت للقمر واحنا توّنا نسوي كذا “ ..

والحين اكتشفنا إن الوصول للقمر كذبة ..

أمريكا هي اللي طلّعت هالكذبة .. واحنا روّجنا لها وصدّقناها ..


هذا اللي عندي ..

وممكن يكون فيه إيميلات ثانية تستثيرني وتخليني أكتب شي من عندي ..

يعطيكم العافية ..




منقول من الإيميل